Deur Kara Olivier
Maties Vrouerugby se eerste oefenkamp ooit het tussen 6 en 9 September in Bredasdorp plaasgevind.
“Tradisioneel het net die manspanne op kampe gegaan. Noudat die vroue dit gedoen het, is ek seker hulle sal die waarde daarin sien. Ons hoop dit word ’n jaarlikse instelling vir die vroueprogram,” sê hoofafrigter Johann Zeier.
Die span het sedert die begin van die seisoen, slegs ses weke gelede, “reuse-vordering” gemaak, sê Bianca Augustyn, kaptein van die Maties Vrouerugby se eerste span.
Die pad na USSA
Die span het die naweek gebruik om voor te berei vir die komende USSA rugbysewestoernooi die naweek van 22 tot 25 September in Kimberley.
Die spelers het hul tyd weg gebruik om daarop te fokus om soveel as moontlik te leer ter voorbereiding van dié toernooi en die res van die seisoen.
“Die hooffokus was om al die stelsels in plek te kry en om ’n goeie grondslag te lê om op voort te bou vir USSA. Die kamp het ons ekstra tyd gegee om werklik al die spelpatrone te leer en op die basiese beginsels te fokus,” sê Augustyn.
Die doelwit is om onder die top vier spanne by USSA te eindig.
“Spanbou was ook vir ons baie belangrik,” sê Zeier. Hy hoop die bande wat gesmee is terwyl Maties op die kamp was, die span in staat sal stel om beter op en van die veld af te skakel.
“Dit het die samehorigheid in die groep verbeter en ’n bietjie spangees opgebou en ek hoop dit kan lei tot beter prestasies op die veld.”
Die kamp het aan die spelers ’n soortgelyke sportomgewing en geleenthede as hul manlike eweknieë gebied en is ’n bewys van die Universiteit Stellenbosch se ondersteuning van vrouesport, voeg Zeier by.
Die span bedank graag Maties Rugby, Maties Sport en die Universiteit Stellenbosch vir hul volgehoue ondersteuning.