Suid-Afrika se enigste Universiteit met drie watergebaseerde astroturf-velde
Terwyl ons voorberei vir die 2025 USSA Winterspele, is daar opgewondenheid onder al die Maties Sport-kodes. Tussen 27 Junie en 9 Julie sal Maties sy volle sportkrag ten toon stel — hetsy op ons tuis-astroturf of elders in die land in Gqeberha, Pretoria of Johannesburg. Ons spanne se doelwit is om op verlede jaar se prestasies voort te bou, nuwe talent te vier en goud op elke baan, veld en astro na te jaag.
Voor die spanne vertrek, het Maties Sport ’n USSA-afskeidfunksie aangebied, waar die Hoofdirekteur van Maties Sport, mev. Ilhaam Groenewald, die belangrikheid van eenheid, diversiteit en leierskap as ’n wen formule beklemtoon het. Dit was ’n kragtige herinnering dat sukses nie toevallig is nie. Oorwinning vereis eenheid van visie, waar alle spanlede saam na dieselfde doel werk sonder verdeelde agendas. Dit vra vir diversiteit in vaardighede, en die erkenning dat elke speler ’n unieke rol het, en dat een dimensionele spanne nooit kampioenskappe wen nie. Belangriker nog, dit vereis leierskap — nie net van kapteins af nie, maar ook van die leierskorps wat deur ons afrigters ontwikkel word.
Ná maande se voorbereiding, is sy vol vertroue in die gereedheid van al die sportkodes. Sy het verder beklemtoon dat die harde werk reeds gedoen is, en dat dit nou tyd is om te kompeteer, ons potensiaal te bereik en om seges na te jaag.
Die waarnemende Hoofbedryfsbeampte van Stellenbosch Universiteit, Prof. Nicola Smit, het haar eerste USSA-funksie bygewoon.
In haar toespraak het prof. Smit gesê: “Ek het groot bewondering vir ons student-atlete wat konsekwent uitblink, beide op die sportveld en in die lesingsale. Om nasionale titels én akademiese sukses gelyktydig te behaal, verg onwrikbare dissipline, toewyding en uitsonderlike tydsbestuurvaardighede. Hierdie eienskappe gaan julle in die toekoms beslis tot waarde wees..
“Wanneer julle die veld, baan of astro betree, onthou die ongelooflike reis wat julle afgelê het en die ondersteuning van julle spanmaats, afrigters en al jul mede-Maties by Stellenbosch Universiteit. Julle kompeteer nie net nie — julle verteenwoordig hulle almal,” het sy voortgegaan.
Hokkie
Maties Hokkie sal meer as 20 universiteite van regoor Suid-Afrika verwelkom om mee te ding in die 2025 USSA Hokkie Kampioenskappe. Dit is die eerste keer dat die A-, B- en C-afdelings by ’n enkele universiteit aangebied word, danksy ons nuut voltooide derde astroturf. Maties Sport is die enigste universiteit in Suid-Afrika met drie watergebaseerde astro-velde, wat van 30 Junie tot 4 Julie in Coetzenburg gebruik sal word vir sowel mans- as vrouespanne.
“Daar is ’n opwinding in die wete dat ons nie net vir medaljes speel nie; ons speel hier, voor ons eie mense, vir ons universiteit. Ons voel die gewig van die verwagtinge, maar belangriker, ons voel die trots,” sê Aiden Tun, Maties Hokkie-manspan se kaptein.
Aiden beskryf dit as ’n geleentheid vir Maties Hokkie om te wys wie hulle is — nie net deur hul prestasie op die astro nie, maar ook deur hul gedrag, samehorigheid en onwrikbare toewyding om vir elke bal te veg.
Ons nooi die Stellenbosch-gemeenskap en omliggende areas hartlik uit om die wedstryde by te woon en Suid-Afrika se talentvolste student-hokkiespelers in aksie te sien en ondersteun. Toegang is gratis, en ’n toegewyde ondersteunerstent sal die hele week vermaak en verversings verskaf.
Netbal
Van 30 Junie tot 4 Julie, sal ons Maties-netbalspan energie bring in Gqeberha onder leiding van die pas aangestelde hoofafrigter Sasha-Lee Petersen, met Jo Prins as haar hulp-afrigter.
Sasha-Lee, ’n voormalige Maties-netbalspeler wat die Stellenbosch Universiteit in verskeie USSA-toernooie verteenwoordig het, bring eerstehandse ervaring van die uitdagings om ’n student-atleet te wees.
“Behalwe die opwinding op die baan het ek onlangs my Meestersgraad in Sportwetenskap aan Stellenbosch Universiteit voltooi, en hierdie reis, wat my passie vir sport en toewyding tot akademie saamgeweef het, dra ek met groot trots. Om nou terug te keer en die klub te lei wat my gevorm het, en soveel van my waardes gevestig het, is beide nederig en ongelooflik lonend,” sê Petersen.
Rugby
Ons 15-manspan wil voortgaan met sy heerskappy en jaag ’n vierde agtereenvolgende USSA-titel. Onder die leiding van hoofafrigter Kabamba Floors en assistent Craig Barry. Dié dinamiese Maties-rugbyspan is hard aan die werk. Die Maties-vrouerugbyspan het ’n bronsmedalje in die 2024 USSA Rugby 10’s-toernooi gewen. Hierdie jaar sal hulle in die 15’s-formaat meeding. Nog meer indrukwekkend, die pas aangestelde hoofafrigter, Aneesah Abrahams, het haar span vroeër vanjaar gelei tot hul tweede FNB Vroue Varsitybeker-titel in net drie seisoene. Die aksie sal van 30 Junie tot 4 Julie by UP Tuks plaasvind.
Vlugbal & Basketbal
Die vlugbalspanne sal onderskeidelik deur Antonio en Tersia Rossouw gelei word, wat hul nasionale ervaring na elke van die spanne bring. Dit sal die klub se eerste groot binnenshuise vlugbaltoernooi in ’n lang tyd wees, en ondersteuners sien daarna uit om die spelers vanaf 30 Junie 2025 by die Universiteit van Kaapstad te ondersteun.
Die Maties mans- en vrouespanne sal in die 3×3-basketbalkampioenskappe by Wits Universiteit in Johannesburg van 4 tot 9 Julie 2025 meeding.
Muurbal & Pluimbal
Verlede jaar het die Maties-muurbalspanne groot indruk gemaak. Die A-span het ’n bronsmedalje in Afdeling A verower, terwyl die B-span tot in die eindstryd gevorder het en ’n silwermedalje gewen het. In pluimbal het Maties in die spankompetisie uitgeblink en ’n silwermedalje in ’n taai eindstryd teen NWU Potchefstroom gewen.
Ons sien uit na nóg ’n sterk vertoning in 2025. Die muurbal-toernooi sal by Nelson Mandela Universiteit plaasvind, terwyl die pluimbal-toernooi by UP Tuks is.
Deur Jamie Wyngaardt