De Jongh geniet sy lewe na rugby
Ná byna twee dekades as beroepsrugbyspeler het Juan de Jongh meer as genoeg kennis, ervarings en stories om te deel – geen wonder nie afrigting en ’n potgooi is die vrugte van sy uittrede.
De Jongh en sy mede-Springbok Rudy Paige is die breintrust agter die gewilde “Behind the Ruck” potgooi.
“Ons het op die gholfbaan gesels oor die moontlikheid van ’n potgooi. Rudy het reeds ophou speel en ek was baie naby aan uittrede. Ons wou graag iets begin waar ons stories kon deel. Ons het so baie om te vertel oor die lewe op en weg van die rugbyveld. Ons wou vertel van uitdagings om jongelinge in te lig. Ons wou mense toegang gee tot wat alles agter die skerms gebeur,” vertel De Jongh.
Vir De Jongh is dit ’n genotvolle ervaring om die potgooi saam met Paige te doen.
“Ek het ’n wonderlike loopbaan oor die tydperk van 16 jaar gehad. As ek terugkyk, is daar niks waaroor ek spyt is nie. Ek het nooit ’n baie groot besering gehad wat my loopbaan bedreig het nie, ek was ’n dubbel-Springbok (15s en 7s), ek het die Olimpiese Spele bygewoon en daar was die Curriebeker- en VRK-seges.
“Ek het al by doelwitte bereik. Ek weet ek het elke dag van elke seisoen my beste gegee,” vertel De Jongh, wat 102 wedstryde vir die Stormers en 83 vir die Westelike Provinsie gespeel het.
De Jongh het 19 toetse vir die Bokke speel en was in 64 wedstryde vir die Engelse klub Wasps in aksie.
De Jongh was deel van die eerste seëvierende Varsitybeker-span in 2008. Hy was ook die eerste speler wat sy Springbok-klere verwerf het nadat hy in die toernooi in aksie was.
Behalwe vir die potgooi spandeer De Jongh nou sy tyd as afrigter by die Stellenbosch Akademie vir Sport se internasionale rugby instituut én breier van die Boland o.21-span.
“Ek het my laaste seisoen by die WP as speler-afrigter spandeer. Dit was ’n besonderse ervaring. Ek hou regtig baie van afrigting. Ek hou van die idee om jongelinge te help om hul drome te verwesenlik. Ek fokus op die groep se aanvallende spel by SAS Rugby. Hier spandeer ek tyd saam met 54 spelers van regoor die wêreld, almal met die doel om die beste rugbyspeler te wees wat hy moontlik kan wees.
“Ek word ook omring deur ander goeie en ervare afrigters. Dit is lekker om deel van so besonderse groep mense te wees.”
In sy eerste seisoen as afrigter van die jong Bolanders het hulle die Eerste Liga gewen. “Dit was ’n besonderse ervaring. Ek het so baie geleer. Ek sien baie uit na die komende seisoen.”
Vir De Jongh is dit belangrik om sy lewe ten volle te geniet.
“Ek is dankbaar dat ek my loopbaan op my terme kon beëindig. Dit was vir my baie belangrik. Daar is ’n doelgerigtheid in my lewe. Om meer tyd saam met my familie te spandeer, is vir my baie belangrik en dit beteken vir my baie. Lewe na rugby het sy uitdagings, maar ek sien uit na alles wat nog gaan kom vir my.”