Maties Sport verwelkom graag vir Lungako Mweli wat vanaf 1 Julie 2023 in die pos van Bestuurder: Studente-Atleet Ondersteuningsdienste aangestel is. Mweli het ’n kort vraag-en-antwoord sessie met Maties Sport gehad na haar aanstelling.
Hoe voel jy daaroor om in hierdie nuwe pos by Maties Sport aan te sluit?
Dit is ’n eer om by die Maroenmasjien-familie aan te sluit. Ek voel bevoorreg en geseënd om in ’n posisie geplaas te word wat my die geleentheid bied om studente-atlete se akademiese en atletiese welstand te ondersteun, te dien en te verbeter. My hoop is om reg te laat geskied aan die rol.
Jy is self ’n voormalige netbalspeler, hoe belangrik is dit om ’n balans tussen jou sport en studies te hê? Hoe hoop jy om ons HP-studente-atlete in hierdie verband met jou kundigheid te lei?
Ja, daardie ervaring het my toegerus met ’n paar lewensvaardighede en lesse. Om ’n balans te handhaaf en die lewens-/universiteitseise te bestuur is noodsaaklik.
Ek stel my voor studente-atlete in ’n drie-pilaar-stelsel in die universiteitsverband wat persoonlik, akademie en sport insluit. Dit is belangrik om te onthou hulle is Altyd Mens, Eerste Student, Tweede Atleet.
Ek glo die balans strek verder as net sport en studies aangesien daar ander aspekte van ’n mens se lewe is wat hul akademiese en atletiese prestasie beïnvloed. Gevolglik is dit belangrik om gesonde hulpmiddels te bied wat daarop gemik is om studente-atlete te help om daardie areas te bestuur met die doel om te sien hoe hulle kwaliteit prestasies lewer, beide akademies en op die speelveld. Ek vertrou dat as ons die regte waardes en ingesteldheid saamvoeg met hul eie dissipline en werksetiek, die toekoms van elke student-atleet vorm sal aanneem.
Waarna sien jy die meeste uit om te implementeer en te doen wanneer jy hier aankom?
Ek het verskeie idees wat individuele prosesse, groepwerk en inisiatiewe behels. Ek wil egter eers die kultuur assesseer, die huidige dinamika en spesifieke behoeftes verstaan wat geïdentifiseer is deur die kern individue wie ek sal dien en met wie ek sal saamwerk. Ek sien beslis daarna uit om natuurlik met die span saam te werk om innoverende welstandoplossings te vestig vir die groei en ontwikkeling van ons studente-atlete.
“Die aanstelling van me Mweli is ’n belangrike stap vorentoe vir die Maties Sport Hoë Prestasie-program om ons studente-atlete en hoofafrigters holisties te ondersteun. As ’n oud-studente-atleet self het sy ’n unieke begrip van die akademiese, sport- en sosiale eise wat aan studente-atlete gestel word. Die ervaring sal handig te pas kom wanneer sy hulle help om die beste besluite moontlik te neem om hul tyd by Stellenbosch Universiteit die mees fenomenale student-atleet ervaring te maak. Me Mweli sal ’n deurslaggewende rol speel om ons reeds gevestigde PACER-program vorentoe te dryf om te verseker dat ons studente-atlete toegerus is met die gereedskap wat hulle nodig het om eienaarskap van hul akademiese en sport sukses te neem,” het Maties Sport Hoof van Hoë Prestasie, Grant van Velden gesê.