Deur Jamie Wyngaardt
Vir die meeste mense is die balansering van sport en tersiêre opleiding ’n uitdaging, maar Crystal Beukes laat dit moeiteloos lyk. Derdejaar Menslike Lewenswetenskappe-student aan die Universiteit Stellenbosch volg ’n graadkursus saam met haar gholfloopbaan.
Beukes was aanvanklik onbewus daarvan dat daar ’n amptelike Maties-gholfklub was, totdat Sportbestuurder vir gholf, Karen Swart haar gekontak het en haar ingeskryf het om lid van die klub te wees. Sy sê om deel van ’n gholfspan te wees, het nooit moontlik gelyk nie, aangesien haar hoërskool baie klein was, en gholf nie ’n groot sport was nie. Om deel wees van die Maroenmasjien se span te wees, is vir haar opwindend.
Gedurende die eerste ses maande van haar lidmaatskap by die Maties-gholfklub, het Beukes die geleentheid gehad om deel te neem aan die 2022 FISU Wêreld Universiteitskampioenskap vir gholf wat tydens Julie in Torino, Italië gehou is. Sy was deel van ’n span bestaande uit vier speler. Sy was die enigste vrou in Suid-Afrika se span.
Die boorling van Somerset-Wes, is op ’n baie jong ouderdom aan die sport bekendgestel. Haar ouer broer was ’n groot invloed. Sy het gereeld saam met hom na toernooie gereis wat haar belangstelling in gholf aangewakker het.
Op nege het Crystal besluit sy wil graag gholf speel, dieselfde jaar is sy geïdentifiseer en genooi om by die Suid-Afrikaanse Gholfontwikkelingsraad (SAGDB) aan te sluit. Die SAGDB is ’n nie-winsgewende organisasie wat daarop gemik is om gholf vir almal toeganklik te maak deur oefen- en speelgeleenthede – veral vir jong kinders – te verskaf en te fasiliteer.
“Die SAGDB het my op baie maniere bygestaan met betrekking tot my junior gholfloopbaan. Dit het nuwe toerusting, verskeie oefensessies geborg en vir baie van die ekstra toernooi-uitgawes betaal. Shawn Adriaanse het ’n groot rol gespeel om my te help met toerusting, befondsing en reis. Sonder Adriaanse-hulle sou ek beslis nie gekom het waar ek vandag is nie,” sê Beukes.
Sy is al jare lank ’n lid by die Stellenbosch-gholfbaan en het al ’n paar keer die Vroueklubkampioenskapsbyeenkoms gewen. Toe sy op 19 met haar studies begin het, was sy een van die heel eerste vroue wat by die Maties-gholfklub aangesluit het.
Die opkomende ster sê om by die Wêreld Studente Spele te speel, was vir haar ’n spesiale oomblik as Matie. “Ek het nie net my land verteenwoordig nie, maar ook Maties. Dit was vir my ’n absolute eer,” vertel Beukes.
Sport het haar op meer as een manier geseën. Dit het haar toegelaat om nuwe mense en kulture te ervaar wat sy nooit gedink het sy sal ooit ervaar nie.
Die leuse wat haar inspireer, is van haar gunsteling professionele gholfspeler, Michelle Wie: “Sonder die opdraandes, sonder swaarkry, dink ek nie jy waardeer die afdraande so baie nie.”
Beukes glo die op- en afdraandes in haar sportloopbaan is ewe belangrik en dat dit jou ’n les leer oor hoe om te groei en sterker terug te kom.