Na afloop van die 2024 FNB Varsitybeker-toernooi waartydens Maties se vroue die silwermedalje gewen het, is twee van die span se spelers vir hul uitsonderlike spel beloon met plekke in die Suid-Afrikaanse vir die FISU Wêreld Universiteitspele rugbysewes.
Aksie is van 10-12 Junie in Frankryk.
Sportwetenskap Honneursstudent Elme Kruger en derdejaar Sportwetenskap-student Ankia Viljoen is gekies om Suid-Afrika te verteenwoordig. Hul insluiting was beloning vir die goeie spel wat hulle opgedis het met die onlangse FNB Varsitybeker-toernooi. Maties was verdedigende kampioene én onoorwonne tot met die 2024-eindstryd wat die Marjoenmasjien met ses punte teen die Universiteit van Fort Hare verloor het.
Viljoen het in ’n sportiewe gesin grootgeword. Haar eerste-keuse sport was netbal, waarin sy op skool uitgeblink het. Toe sy egter by Stellenbosch Universiteit aankom, het sy besluit om tydelik met sport op te hou en op haar studies te fokus. Sy het steeds aktief gebly deur koshuis- en klubnetbal te speel.
“Ek het besef ek het ’n nuwe rigting in my lewe nodig…In my tweede jaar het ek besluit om rugby te speel, en toe het dinge net van daar af ontwikkel. Sport was nog altyd deel van my identiteit en alles wat ek doen, is sportgeoriënteerd. Ek eet op ’n sekere manier, ek leef op ’n sekere manier om my sportprestasie te verbeter – selfs my studies is sportgeoriënteerd,” het Viljoen gesê.
Hierdie positiewe houding en dryfkrag is wat haar laat uitstaan. Sy was een van 18 van die land se mees belowende vroue spelers wat in Junie 2023 by die Stellenbosch Akademie vir Sport (SAS) bymekaargekom het vir ’n driedaagse ontwikkelingskamp. Hier het die afrigterspan van die Springbok-sewesvroue hul vaardighede en vermoëns getoets.
Later dieselfde jaar is sy gekies om by die Internasionale Uitnodigingstoernooi in Doebai vir die Springbok-sewes se A-span te speel. Sedertdien het sy ’n ontwikkelingskontrak ontvang.
In teenstelling met baie jong vroue wat rugby by universiteit ontdek het, het Kruger dit by ’n internasionale skool in Doebai ontdek, waar haar gesin vir ses jaar gewoon het nadat haar pa ’n werksgeleentheid daar aanvaar het.
Suid-Afrika is bekend vir hul wêreldklas-rugby, en Kruger het gevoel dit is net gepas om rugby te speel aangesien dit by haar skool aangebied is. “Daar was ’n o.11-raakrugbyspan vir dogters, en my denkrigting was dat ek is Suid-Afrikaans so rugby móét ek speel,” het Kruger laggend vertel.
Sy was in Graad 11 toe haar gesin na Suid-Afrika teruggekeer het. Sy het aanhou oefen, en ’n nasionale rugbyafrigter het haar talent raakgesien en haar die geleentheid gebied om deel te wees van die Suid-Afrikaanse o.18-span wat derde geëindig het by die Wêreld Jeug Raakrugby-kampioenskappe in Maleisië in 2018.
Alhoewel Kruger dalk die meeste ervaring het as ’n kompeterende rugbyspeler en toegewyde student, het sy op die vraag hoe sy dit hanteer gesê: “Koffie, baie koffie!”
Dié Honneursstudent was vanjaar ’n uitstaande speler vir Maties en het twee agtereenvolgende driekuns aan drieë behaal en was die voorste puntemaker in die Varsitybeker-toernooi.
Dié Maties-duo het genoem dat die geleentheid om deel te wees van die span ’n waardevolle ervaring is terwyl hulle as spelers bly ontwikkel. Hulle het albei hul dank uitgespreek teenoor hul families, Maties Sport en Maties Rugby vir hul ondersteuning. Hulle is veral dankbaar teenoor Johann Zeier, die hoofafrigter van Maties Vrouerugby, vir sy mentorskap en bystand in hul ontwikkeling as spelers.
Meer inligting oor die 2024 FISU Wêreld Universiteitspele Rugbysewes, insluitend uitslae, is hier beskikbaar.
Deur Jamie Wyngaardt